Amazing Grace Ministry Asia hi Pakaijin eina kouna leh eina puihuoina gomsop kiminvo na ahi. Pathien ngailutna kachant jouse hi kahinkho-a kasei jou seng ahipoi. Insunga nao lhumpen in kanapeng in, Ka Pa leh Ka Nu teh nung in hedna-chihna neitheina dinga school pha-a kai ding hi kei ja dinga thil hithei lou ana hitai. Hijeng jong leh World Vision of India leh Mission of Mercy (Kolkota) te ho ministry chanvou chant na jal in high school (kum som jen lut) kahung kai thei in ahi. Hedna leh chihna mudan kihilna ban’a; September 18, 1987 chun, Pakai Jesu huhhingpu leh lengpa din kahinkho-a kana kisan tan ahi. Hiche nia pad hin, kumsom sung’a World Vision leh Mission of Mercy hoa kon’a eina choph (sponsor) luona ho-u kahin thah het doh tan ahi. Pathen tohgon khat ana hi jon ahi.
1992 February lha hapta jona lam chun, Pakaiyin ama natong dingin eina kou tan ahi. Ka insung mijousen, eideisah nau chu Indian Administrative Service jih doh ding hi ahi. Eidei sah nau toh akitoh lou jeh in, ka insung mite din thumop ngaisah loupa kahitai. Insunga lekha sim keima bou kahi jeh-a, ngailutna jal’a ei hi-hot uchu kahen, kalung ana deh pon ahi. Lungguh in kataovin, “Pakai keima neikou leh ka innsung mite jong neikouna aw hedsah in” katin ahi. Phat ahung che jom peh in, Bangalore a um SABC a 1996 kum chun, B.Th kahin chai thei tan ahi. Hiche jouchun, Bible Houhil in NBC, CCPUR a kum khat kahin tong in ahi. 1988 kum chun COTR &TS mun’a M.Div kahin jou kit tan ahi. Chu in Dimapur’a um Eastern Bible College’a Bible Houhil natoh kum ni kahin tongkit’in, hiti hin internship in kana tong in ahi.
Kum 2000-2004 sung in, America gam’a M. Th (ITS, LA, CA) leh D.Min (ORU, Tulsa, OK) mun tenia kon’in kahung graduate tan ahi. America’a Green Card leh agam mi hijeng theina chan in lhep patep kanachang in ahi. Hijong leh Pakai in eikouna masa jeh chun eihin lepui kitnin, tuhin, Pakai lengpi leiya katoh khompi ding Ms. Hevei Haokip, Manipur University (April, 2005) a kon’a M.A Pol. Sc graduated chuleh ECC, CCPUR, Manipur (June, 2001) mun’a M.Div hung graduate toh “Tahsan” nan kal kasep khom pan lhon tan ahi. Dec 16, 06 nin Pathien phathei bohna laigil ga Anna Lhingnunnem Haokip in eihin belap kit lhon in ahi.
2005 March nisim thum nin, AGMA hi Bijang ECA Church a thensona kin ana kinei tan ahi. Chujou kum khat nung in, 2006 March nisim khat nin -Assam gam’a Guwahati khopi’a Training Center “Native Worker Training Center” hon doh ahitai.
